ബ്രിട്ടനിലെ വിചിത്രമായ സ്റ്റോൺഹെൻജ് ഘടന; കാരണം കണ്ടെത്തിയെന്ന് ഗവേഷകർ

ബ്രിട്ടനിലെ ഏറ്റവും പഴക്കമുള്ള ഘടനകളിലൊന്നാണ് സ്റ്റോൺഹെൻജ്. ഈ വിചിത്രഘടനയുടെ ഉദ്ദേശലക്ഷ്യം കണ്ടെത്തിയെന്ന് ഗവേഷകർ പറഞ്ഞു. ബ്രിട്ടനിലെ പല സ്ഥലങ്ങളിൽനിന്നാണു സ്റ്റോൺഹെൻജിൽ ഉപയോഗിച്ച കല്ലുകൾ കൊണ്ടുവന്നിട്ടുള്ളത്. അതിനാൽ തന്നെ ബ്രിട്ടനിലുള്ള ആദിമ ജനതയെ ഒരുമിപ്പിക്കുക എന്ന ലക്ഷ്യത്തിൽ നിർമിച്ചതാണു സ്റ്റോൺഹെന്‍ജെന്നാണ് ഇപ്പോൾ ഗവേഷകർ പറയുന്നത്. പല സ്ഥലങ്ങളിൽ നിന്ന് ആഘോഷങ്ങളോടെയും വിരുന്നുകളുടെയും അകമ്പടിയോടെയായിരുന്നു സ്റ്റോൺഹെൻജിലേക്ക് കല്ലുകൾ എത്തിച്ചതും സ്റ്റോൺഹെൻജ് നിർമിച്ചതും.

സ്റ്റോൺഹെൻജിനു പരിസരത്തു നിന്ന് മുൻപ് ഒട്ടേറെ അസ്ഥികൂടങ്ങളും മറ്റും കണ്ടെത്തിയിരുന്നു. അതിനാൽ തന്നെ ഇത് പഴയകാലത്തെ ഒരു ശവപ്പറമ്പാണെന്ന് വാദമുണ്ടായിരുന്നു. സ്റ്റോൺഹെൻജിലെ കല്ലുകളിൽ എന്തെങ്കിലും കൊണ്ട് അടിച്ചാൽ വളരെ ഉയർന്ന ശബ്ദത്തിലാകും മുഴക്കം കേൾക്കുക. സ്റ്റോൺഹെൻജ് ഘടനയുടെ ഉള്ളിലുള്ള കല്ലുകളിൽ ഏറ്റവും വലുതായ കല്ല് എത്തിച്ചത് വടക്കൻ ഇംഗ്ലണ്ടിൽനിന്നോ അല്ലെങ്കിൽ സ്‌കോട്‌ലൻഡിൽ നിന്നോ ആകാമെന്ന് ഇടയ്ക്ക് പഠനം പുറത്തിറങ്ങിയിരുന്നു. സ്റ്റോൺഹെൻജിന്‌റെ ഉൾവൃത്തങ്ങളിലുള്ള കല്ലുകൾ ബ്ലൂയിഷ് സ്‌റ്റോൺ എന്ന പേരിലാണ് അറിയപ്പെട്ടിരുന്നത്. ഇവയ്ക്ക് ഒരു നീലഛവി ഉള്ളതിനാലാണ് ഇത്. സ്റ്റോൺഹെൻജിനു ചുറ്റും ആയിരക്കണക്കിന് ദുരൂഹമായ കുഴികൾ ഇടക്കാലത്തു കണ്ടെത്തിയിരുന്നു.

പതിനായിരക്കണക്കിനു വർഷം പഴക്കമുള്ള കുഴികളാണ് ഇവ. അക്കാലത്ത് ജീവിച്ചിരുന്ന വേട്ടക്കാർ മൃഗങ്ങളെ വീഴ്ത്താനായി കുഴിച്ച കുഴികളാണിതെന്നാണ് ഗവേഷകർ പറയുന്നത്. കാലപ്പഴക്കത്താൽ ഭൂമിക്കുള്ളിൽ മറഞ്ഞനിലയിലാണ് ഈ കുഴികളിൽ പലതും. പുറമേ നിന്നു നോക്കിയാൽ കാണാനാകില്ല. 8 അടിയിൽ കൂടുതൽ വ്യാസമുള്ള 415 വലിയ കുഴികളും അതിൽ കുറഞ്ഞ വ്യാസമുള്ള മൂവായിരത്തിലേറെ ചെറിയ കുഴികളും സ്റ്റോൺഹെൻജ് പരിസരത്തു നിന്നു കണ്ടെത്തിയിരുന്നു. ഇതിലെ ഒരു വലിയ കുഴിയിൽ പതിനായിരം വർഷം പഴക്കമുള്ള കുറേ ഉപകരണങ്ങളും കണ്ടെടുത്തിട്. മാനുകൾ, കാട്ടുപന്നികൾ, വംശനാശം വന്നു ഭൂമിയിൽ നിന്ന് അപ്രത്യക്ഷരായ ഓറോക്ക് എന്നയിനം കന്നുകാലികൾ എന്നിവയെ വീഴ്ത്താനായിരുന്നത്രേ ഈ കുഴികൾ കുഴിച്ചിട്ടത്. ബ്രിട്ടനിൽ ഇതുപോലെ തന്നെ വിചിത്രമായ മറ്റൊരു ഘടനയുമുണ്ട്. 4000 വർഷങ്ങൾക്ക് മുൻപ് നിർമിക്കപ്പെട്ട ഈ ഘടനയുടെ പേര് സീഹെൻജ് എന്നാണ്. ബ്രിട്ടനിലെ നോർത്ത് നോർഫോൽക്കിൽ ഹോമി ഗ്രാമത്തിനോട് ചേർന്നുള്ള കടലോരത്താണ് ഇതു സ്ഥിതി ചെയ്യുന്നത്. 1998ൽ ഇവിടത്തെ മണൽപ്പരപ്പ് മാറിയപ്പോഴാണ് ഈ ഘടന വെട്ടപ്പെട്ടത്. സ്റ്റോൺഹെൻജിൽ കല്ലുകളാണെങ്കിൽ സീഹെൻജിൽ മരത്തടികളാണ്. 55 ഓക്ക് മരങ്ങളുടെ തടികൾ ദീർഘവൃത്താകൃതിയിലാണ് ഇവിടെ സ്ഥാപിച്ചിരിക്കുന്നത്.