തെരുവുനായ്ക്കൾ രണ്ടായിരത്തോളം കോഴിക്കുഞ്ഞുങ്ങളെ കൊന്നു

വെള്ളമുണ്ട ∙ തെരുവുനായ്ക്കളുടെ ആക്രമണത്തിൽ രണ്ടായിരത്തോളം കോഴിക്കുഞ്ഞുങ്ങൾ ചത്തു.വെള്ളമുണ്ട ഒഴുക്കൻമൂല അശോകന്റെ കോഴി ഫാമിലാണ് ഇന്നലെ പുലർച്ചെ തെരുവുനായ്ക്കൾ ആക്രമണം നടത്തിയത്. പ്രദേശത്തു തെരുവുനായ്ക്കളുടെ ശല്യം രൂക്ഷമാണ്. അശോകന്റെ കോഴിഫാമിലെ വലകൾ തകർത്താണ് രണ്ടായിരത്തോളം കോഴിക്കുഞ്ഞുങ്ങളെ നായ്ക്കൾ കെ‍ാന്നത്. നാലായിരത്തോളം കോഴിക്കുഞ്ഞുങ്ങൾ ഫാമിലുണ്ടായിരുന്നു. തെരുവുനായ ശല്യം രൂക്ഷമായതോടെ സ്കൂൾ വിദ്യാർഥികളും കാൽനടക്കാരും ഇരുചക്ര വാഹനയാത്രികരും ഭയത്തോടെയാണു യാത്ര.കഴിഞ്ഞദിവസം ഒഴുക്കന്മൂലയിൽ വ്യാപാരിയായ മണിമ അന്ത്രുവിനെ തെരുവുനായ ആക്രമിച്ചു പരുക്കേൽപിച്ചിരുന്നു.