നാസിഫ് ഹൗസ് മ്യൂസിയം റമസാനിൽ ചരിത്രപ്രദർശനം ഒരുക്കുന്നു

ജിദ്ദ∙ പ്രസിദ്ധമായ ജിദ്ദയിലെ (അൽ-ബലദ്) നാസിഫ് ഹൗസ് മ്യൂസിയം റമസാനിൽ സന്ദർശകർക്കായി ചരിത്രപ്രദർശനം ഒരുക്കുന്നു. വിവിധ സ്ഥലങ്ങളിൽ നിന്നുള്ള പുരാവസ്തുക്കളാണ് ഇവിടെ പ്രദർശിപ്പിക്കുന്നത്. 15-ാം നൂറ്റാണ്ടിന്റെ അവസാനം മുതൽ 20-ാം നൂറ്റാണ്ട് വരെയുള്ള അൽ-ഷോനയിൽ നിന്നുള്ള പുരാവസ്തുക്കൾ പ്രധാന ആകർഷണങ്ങളിൽ ഒന്നാണ്.

ജിദ്ദയുടെ ഹൃദയഭാഗത്തായി സ്ഥിതി ചെയ്യുന്ന അൽ-ഷോന, ഇവിടുത്തെ ഏറ്റവും പ്രധാനപ്പെട്ട പൈതൃക അടയാളങ്ങളിലൊന്നാണ്. സാംസ്കാരിക മന്ത്രാലയത്തിന് കീഴിലുള്ള ജിദ്ദ ഹിസ്റ്റോറിക് ഡിസ്ട്രിക്റ്റ് പ്രോഗ്രാമിന്റെയും ടൂർ ഗൈഡുകളുടെയും വിവരങ്ങൾ അനുസരിച്ച് 20-ാം നൂറ്റാണ്ടിൽ ലോകമെമ്പാടുമുള്ള ഇറക്കുമതി ചെയ്ത സാധനങ്ങൾ സൂക്ഷിക്കുന്ന സംഭരണശാലയായി അൽ-ഷോന പ്രവർത്തിച്ചു. ധാന്യങ്ങൾ, തടി, വെടിമരുന്ന്, മറ്റ് വസ്തുക്കൾ എന്നിവ ഇവിടെ സൂക്ഷിച്ചിരുന്നു.

ഖാബെൽ, ഗോൾഡ് സ്ട്രീറ്റുകളിലെ പ്രവേശന കവാടങ്ങളിലൂടെ അൽ-ഷോനയിലേക്ക് പ്രവേശിക്കാം. സന്ദർശകർക്ക് ഭൂതകാലത്തിന്റെ അനുഭവങ്ങൾ നൽകുന്നതിനൊപ്പം അൽ-ബലദ് സാക്ഷ്യം വഹിച്ച മാറ്റങ്ങളെക്കുറിച്ചുള്ള വിവരങ്ങളും ഇവിടെ നിന്നും ലഭിക്കുന്നു.