രജതജൂബിലി നിറവിൽ ഷിക്കാഗോ മലയാളി അസോസിയേഷൻ ഓഫ് റെസ്പിറേറ്ററി കെയർ

ഷിക്കാഗോ ∙  ഷിക്കാഗോ മലയാളി അസോസിയേഷൻ ഓഫ് റെസ്പിറേറ്ററി കെയർ (മാർക്) രജതജൂബിലി നിറവിൽ. അമേരിക്കയിലെ റെസ്പിറേറ്ററി കെയർ മേഖലയിലെ തെറാപ്പിസ്റ്റുകളെ സംഘടിപ്പിച്ചുകൊണ്ട് കഴിഞ്ഞ കാൽ നൂറ്റാണ്ടായി വ്യത്യസ്ത പ്രവർത്തനം കാഴ്ച വയ്ക്കുന്ന ഷിക്കാഗോ മലയാളി അസോസിയേഷൻ ഓഫ് റെസ്പിറേറ്ററി കെയർ 2001 ലാണ് രൂപീകരിച്ചത്. 

അമേരിക്കൻ അസോസിയേഷൻ ഓഫ് റെസ്പിറേറ്ററി തെറാപ്പിസ്റ്റ് AARC-ന്റെ അംഗീകാരമുള്ള ഷിക്കാഗോ മലയാളി അസോസിയേഷൻ ഓഫ് റെസ്പിറേറ്ററി കെയറിൽ 250 തിലധികം  അംഗങ്ങളുണ്ട്. ഷിക്കാഗോ മലയാളി അസോസിയേഷൻ ഓഫ് റെസ്പിറേറ്ററി കെയറിന്റെ നേതൃത്വത്തിൽ കോട്ടയം മെഡിക്കൽ കോളജിന് വെന്റിലേറ്റർ ഉൾപ്പെടെയുള്ള മെഡിക്കൽ ഉപകരണങ്ങൾ, പ്രശസ്ത സാമൂഹിക പ്രവർത്തക ഡോ. സുനിലിന്റെ നേതൃത്വത്തിൽ നിർധനരായവർക്ക് ഭവനങ്ങൾ, സാമ്പത്തികമായി പിന്നോക്കം നിൽക്കുന്ന വിദ്യാർഥികൾക്ക് സ്കോളർഷിപ്പ്, സമീപ കാലങ്ങളിൽ കേരളത്തിലുണ്ടായ പ്രകൃതി ദുരന്തങ്ങളിൽ അതാത് കാലത്തെ സർക്കാരുമായി സഹകരിച്ച് നടത്തിയ സാമ്പത്തിക സഹായങ്ങൾ എന്നിവയ്ക്ക് പുറമെ ഷിക്കാഗോയിലെ  സാമൂഹിക പ്രവർത്തകനായ ഫാ. മൈക്കൽ ഫ്ലേഗറിന്റെ നേതൃത്വത്തിൽ ഷിക്കാഗോയിലും പരിസര പ്രദേശങ്ങളിലും ഫുഡ് പാൻട്രി ഉൾപ്പെടെയുള്ള സഹായങ്ങൾ വിതരണം ചെയ്യുവാനും ഷിക്കാഗോ മലയാളി അസോസിയേഷൻ ഓഫ് റെസ്പിറേറ്ററി കെയറിന് സാധിച്ചു എന്നത് അഭിമാനകരമാണെന്ന് ഭാരവാഹികൾ പറഞ്ഞു. 

കോവിഡ് കാലഘട്ടത്തിലെ പ്രവർത്തനങ്ങൾക്ക് ആരോഗ്യ സംരക്ഷണ മികവിനുളള 'കോവിഡ് വാരിയർ' പുരസ്കാരം ഷിക്കാഗോ മലയാളി അസോസിയേഷൻ ഓഫ് റെസ്പിറേറ്ററി കെയറിന്റെ പ്രവർത്തനങ്ങൾക്ക് ലഭിച്ചിരുന്നു. മലയാളി റെസ്പിറേറ്ററി തെറാപ്പിസ്റ്റുമാരുടെ പൊതു വേദി എന്ന നിലയിൽ എല്ലാ വർഷവും ഷിക്കാഗോ മലയാളി അസോസിയേഷൻ ഓഫ് റെസ്പിറേറ്ററി കെയർ അംഗങ്ങൾക്കായി കോൺഫറൻസ്, കുടുംബ സംഗമം, പിക്നിക്, ചാരിറ്റി തുടങ്ങിയ വിവിധ പരിപാടികളും ക്രമമായി നടത്തുന്നു. 

രജതജൂബിലി ആഘോഷത്തിന്റെ ഭാഗമായി ഈ വർ‍ഷം ഒക്ടോബറിൽ റെസ്പിറേറ്ററി കെയർ വാരത്തിൽ ആരംഭിച്ച്  2026 ഒക്ടോബർ മാസം സമാപന സമ്മേളനത്തോടെ അവസാനിക്കുന്ന ഒരു വർഷം നീണ്ടു നിൽക്കുന്ന കർമപരിപാടികൾക്കാണ് ഷിക്കാഗോ മലയാളി അസോസിയേഷൻ ഓഫ് റെസ്പിറേറ്ററി കെയറിന്റെ പൊതുയോഗം രൂപം നൽകിയിരിക്കുന്നത്. പ്രസിഡന്റ് ജോർജ് മത്തായിയുടെ നേതൃത്വത്തിൽ സ്കറിയാകുട്ടി തോമസ് (ജനറൽ കോ ഓർഡിനേറ്റർ), വിജയ് വിൻസെന്റ് (അഡ്മിനിസ്ട്രേറ്റീവ് കോ ഓർഡിനേറ്റർ), രഞ്ജി വർഗീസ് (ഫിനാൻസ് കോ ഓർഡിനേറ്റർ), സണ്ണി കോട്ടുകപളളി (ജോയിന്റ് ഫിനാൻസ് കോ ഓർഡിനേറ്റർ), എക്സിക്യൂട്ടീവ് കമ്മിറ്റി അംഗങ്ങളേയും ഉൾപ്പെടുത്തി രജതജൂബിലി സംഘാടക സമിതിയെ തിരഞ്ഞെടുത്തു.

ഭവനദാന പദ്ധതി, മെഡിക്കൽ ഉപകരണ വിതരണം ഉൾപ്പെടെയുള്ള വിവിധ ധനസഹായ പദ്ധതികൾ, രജതജൂബിലി സുവനീർ എന്നിവ നടപ്പാക്കും. റോയ് ചേലമലയിൽ (കമ്യൂണിറ്റി സർവീസ്), ഫിലിപ്പ് സ്റ്റീഫൻ, ജോമോൻ മാത്യു (മെഡിക്കൽ ഉപകരണ വിതരണം) സനീഷ് ജോർജ്, ടോം ജോസ് (മീഡിയ ആൻഡ് ഐ ടി സപ്പോർട്ട്), സമയ ജോർജ് (കലാപരിപാടികൾ) എന്നിവരെ വിവിധ കമ്മിറ്റികളുടെ കൺവീനർമാരായി തിരഞ്ഞെടുത്തതായി പ്രസിഡന്റ് ജോർജ് മത്തായി, കൺവീനർ സ്കറിയാകുട്ടി തോമസ്  എന്നിവർ അറിയിച്ചു.
(വാർത്ത : അലൻ ചെന്നിത്തല)