‘മക്കളോടൊപ്പം മാതാപിതാക്കളും വിജയിക്കാറുണ്ട്’

മീൻവണ്ടികളിൽ കിളിയായിരിക്കുമ്പോഴും കൂളൂരിനും കാർവാറിനും ഇടയിൽ മീൻ വണ്ടിയോടിക്കുമ്പോഴൊക്കെ കണ്ട സ്വപ്നങ്ങളേക്കാളും ഉയരത്തിലെത്തിയ മാസ്മരികലോകത്താണ് ഞാൻ ... !  ഈ ഫോട്ടോയിൽ കാണുന്നത്  ലണ്ടനിലെ പ്രശസ്ത UNIVERSITY of  GREENWICH  എന്ന സര്‍വകലാശാലയുടെ വൈസ് ചാൻസലറും റജിസ്ട്രാറും ആണ്  !  കൂടെയുള്ളത്  എന്റെ മൂത്ത മോളാണ് , അനു.  അവളുടെ അമ്മയും ഞാനും  ലണ്ടനിലേക്ക് വണ്ടികയറിയത് അവൾ പഠിച്ച  എംബിഎ ബിരുദദാന ചടങ്ങിൽ പങ്കെടുക്കാൻ മാത്രമാണ് ... !

എന്റെ വലിയ മോഹമായിരുന്നു നല്ലൊരു  സർവകലാശാലയിൽ  പോയി പഠിക്കണമെന്നും മറ്റും, പക്ഷേ ജീവിതം വഴിമുട്ടി ഓരോ അരിമണികളും  മണൽ തരികളും കൂട്ടിപ്പെറുക്കാൻ നിർബന്ധിതനായപ്പോൾ മോഹങ്ങളെ വഴിപിരിക്കേണ്ടിവന്നു ..പിന്നെ ഒറ്റപെട്ടവനായി, പഠിച്ചതല്ലാം ഒറ്റക്കായിരുന്നു.. ! എനിക്ക് സാധിക്കാതിരുന്നത്  കൊണ്ട് മാത്രമായിരുന്നു അവൾ ലണ്ടനിൽ വന്നതും റസ്റ്ററന്റുകളിലെ പണികൾ ഉൾപ്പടെ പലതരം ചില്ലറപ്പണികൾ ചെയ്ത്  എല്ലാത്തരം  ജോലികളുടെയും അന്തസ്സ് മനസ്സിലാക്കിയതും പഠിച്ചതും മിടുക്കിയായതും ...! 

ഇക്കഴിഞ്ഞ ഇരുപതാം തിയതി നടന്ന ചടങ്ങിൽ ഈ ഫോട്ടോ സെൽഫോണിൽ കൂടി ഞാൻ എടുക്കുമ്പോൾ എന്റെ കൈകൾ വിറച്ചിരുന്നു, കണ്ണുകൾ നിറഞ്ഞിരുന്നു!  ഫോട്ടോയിൽ കൂടി ഞാൻ കണ്ടത് എന്നെ തന്നെയായിരുന്നു ...!   ബിരുദധാനചടങ്ങിൽ ധരിക്കുന്ന പ്രത്യേക വസ്ത്രങ്ങൾ ചടങ്ങിന് ശേഷം അവൾ ഞങ്ങൾക്കിട്ടു തന്നു ..എനിക്ക് ഒരുപാട്  സന്തോഷമായി ! വെറുതെ ഓരോന്നും  ആലോചിച്ച്  നിന്നപ്പോൾ  പാവം അവൾ വന്നെന്നെ കെട്ടിപിടിച്ചു നിന്ന് കരഞ്ഞു .... ! 

2010ൽ ഇറങ്ങിയ രഞ്ജിയേട്ടന്റെ  ' പ്രാഞ്ചിയേട്ടൻ  ആൻഡ്  ദ്  സെയിന്റ്  '  എന്ന സിനിമയിലെ   മമ്മുക്കയുടെ  ഡയലോഗ് ഏകദേശം  ഇങ്ങനെയായാണ്  '  ഇമ്മള് ജയിക്കാത്തിടത്ത് വേറൊരാള് ജയിക്കാൻ ഇമ്മള് കാരണമാകുന്നതും ഇമ്മടെ ജയം തന്നെയാ  ... ‘ ! ദൈവം തമ്പുരാനും ഗുരുജനങ്ങൾക്കും കൂട്ടുകാർക്കും വളർത്തിയവർക്കും തളർത്തിയവർക്കും ഒരുപാട് നന്ദിയുണ്ട്..! അല്ലെങ്കിലും മക്കളോടൊപ്പം  മാതാപിതാക്കളും വിജയിക്കാറുണ്ട് ..!