ഈടില്ലാത്ത കാർഷിക വായ്പ: പരിധി 2 ലക്ഷമാക്കി

ന്യൂഡൽഹി ∙ ഈടില്ലാത്ത ലഭിക്കുന്ന കാർഷിക വായ്പയുടെ പരിധി 1.6 ലക്ഷത്തിൽനിന്ന് 2 ലക്ഷമായി റിസർവ് ബാങ്ക് വർധിപ്പിച്ചു. 2025 ജനുവരി ഒന്നിനകം പുതിയ മാറ്റം വായ്പകളിൽ പ്രതിഫലിക്കണമെന്നാണ് ഉത്തരവ്. കർഷകർക്ക് വായ്പ ലഭ്യത ഉറപ്പാക്കുന്നതിന്റെ ഭാഗമായുള്ള തീരുമാനം ചെറുകിട കർഷകർക്ക് ഏറെ ഗുണകരമാണ്.

2 ലക്ഷം രൂപയ്ക്കു മുകളിലുള്ള  വായ്പയ്ക്ക് ഈട് നൽകണം. നടപ്പുസാമ്പത്തികവർഷം 27.5 ലക്ഷം കോടി രൂപ കാർഷിക വായ്പയായി അനുവദിക്കണമെന്നാണ് ബാങ്കുകൾക്ക് ടാർഗറ്റ് നൽകിയിരിക്കുന്നത്. കഴിഞ്ഞ വർഷം രാജ്യമാകെ വിതരണം ചെയ്തത് 24.8 ലക്ഷം കോടി രൂപയുടെ വായ്പയാണ്.