കോഴിക്കോട് വീട് ഇടിഞ്ഞു വീണു, കോട്ടയത്ത് മരം വീണ് വൻ ഗതാഗതക്കുരുക്ക്; ശക്തമായ മഴയ്ക്കും കാറ്റിനും സാധ്യത

താമരശേരി ചുരത്തിൽ മണ്ണിടിച്ചിലിന് സാധ്യതയെന്ന് മുന്നറിയിപ്പ്. ചുരത്തിലൂടെയുള്ള ഗതാഗതത്തിന് നിയന്ത്രണം.ചുരത്തിലൂടെ അത്യാവശ്യ യാത്രക്കാർ മാത്രമെ സഞ്ചരിക്കാൻ പാടുകയുള്ളൂവെന്നും പൊലീസ്. ചുരം രണ്ടാം വളവിൽ വലിയ വാഹനങ്ങൾക്കും നിരോധനം ഏർപ്പെടുത്തി.

മഹാത്മാഗാന്ധി സർവകലാശാല നാളെ നടത്താനിരുന്ന എല്ലാ പരീക്ഷകളും മാറ്റിവച്ചു. പുതിയ തീയതി പിന്നീട് അറിയിക്കും.

അതിശക്ത മഴ: നാലു ജില്ലകളിലെ വിദ്യാഭ്യാസ സ്ഥാപനങ്ങൾക്ക് നാളെ അവധി

മൂവാറ്റുപുഴയാറിലെ ജലനിരപ്പ് ഉയര്‍ന്ന സാഹചര്യത്തില്‍ സ്ഥിതി വിലയിരുത്താന്‍ മന്ത്രി കെ.കൃഷ്ണൻ കുട്ടിയുടെ അധ്യക്ഷതയിൽ ഓൺലൈൻ യോഗം ചേർന്നു. 

മൂലമറ്റം ജലവൈദ്യുത നിലയത്തിലെ ഉൽപാദനത്തിനു ശേഷം പുറന്തള്ളുന്ന ജലം മലങ്കര ഡാമിലും മൂവാറ്റുപുഴയാറിലുമാണ് എത്തുന്നത്. 

മൂവാറ്റുപുഴ ആറിലെ ജലനിരപ്പ് നിയന്ത്രിക്കാൻ ഇടുക്കി ജലവൈദ്യുത പദ്ധതിയിലെ ഉൽപാദനത്തിൽ രാവിലെ മുതൽ 200 മെഗാവാട്ട് കുറവ് വരുത്താനും തീരുമാനമായി.

പിഎസ്‌സി പരീക്ഷകൾ മാറ്റിവെച്ചു

ജൂലൈ 31 മുതൽ ഓഗസ്റ്റ് 2 വരെ പിഎസ്‍സി നടത്താനിരുന്ന എല്ലാ പരീക്ഷകളും മാറ്റിവച്ചു. 

പുതുക്കിയ തീയതി പിന്നീട് അറിയിക്കുമെന്ന് അധികൃതർ അറിയിച്ചു. അഭിമുഖങ്ങൾക്ക് മാറ്റമില്ല. 

ദുരന്തബാധിത പ്രദേശങ്ങളിൽ നിന്ന് അഭിമുഖത്തിന് പങ്കെടുക്കാൻ പറ്റാത്തവർക്ക് മറ്റൊരവസരം ലഭിക്കും.

കോട്ടയം ജില്ലയിലെ വിനോദസഞ്ചാര കേന്ദ്രങ്ങളായ ഇലവീഴാപൂഞ്ചിറ, ഇല്ലിക്കൽകല്ല്, മാർമല അരുവി എന്നിവിടങ്ങളിലെ പ്രവേശനം നിരോധിച്ചു 

ഈരാറ്റുപേട്ട വാഗമൺ റോഡിലെ രാത്രികാലയാത്രയും ഓഗസ്റ്റ് നാലുവരെ നിരോധിച്ചതായി ജില്ലാ കലക്ടർ അറിയിച്ചു.

എറണാകുളം ജില്ലയില്‍ മഴക്കെടുതി രൂക്ഷമായ മൂവാറ്റുപുഴ മേഖലയിൽ ദുരിതാശ്വാസ ക്യാമ്പ് തുറന്നിട്ടുണ്ട്. 

മൂവാറ്റുപുഴ താലൂക്കിൽ നിലവിൽ 3 ക്യാമ്പുകളാണ് തുറന്നിട്ടുള്ളത്.

എറണാകുളം ജില്ലയില്‍ മഴ ശക്തമായി തുടരുന്ന സാഹചര്യത്തില്‍ സ്ഥിതിഗതികൾ വിലയിരുത്തി ജില്ലാ ദുരന്ത നിവാരണ അതോറിറ്റി.

അടുത്ത 24 മണിക്കൂർ കൂടി ജില്ലയിൽ ശക്തമായ മഴയ്ക്ക് സാധ്യതയുണ്ട്.

മണ്ണിടിച്ചില്‍, വെള്ളപ്പൊക്ക സാധ്യതകളില്‍ കഴിയുന്നവരെ ദുരിതാശ്വാസ ക്യാമ്പുകളിലേക്ക് അടിയന്തരമായി മാറ്റാന്‍ കലക്ടർ നിര്‍ദേശിച്ചു. 

പെരിയാറില്‍ വെള്ളം ഉയരുന്ന സാഹചര്യത്തില്‍ തീരത്തുള്ളവര്‍ ജാഗ്രത പാലിക്കണമെന്നും മുന്നറിയിപ്പ്

തൃശൂർ ജില്ലയിലെ വിനോദസഞ്ചാര കേന്ദ്രങ്ങളിലേക്ക് നിരോധനം ഏർപ്പെടുത്തി.

തൃശൂർ ജില്ലയിലെ എല്ലാ വിനോദസഞ്ചാര കേന്ദ്രങ്ങളിലേക്കുള്ള യാത്രയ്ക്ക് ജൂലൈ 31 വരെയാണ് നിരോധനം.

ചാലക്കുടി മലക്കപ്പാറ വഴിയുള്ള എല്ലാ യാത്രയ്ക്കും രാത്രികാലങ്ങളിൽ ഉൾപ്പെടെ നിയന്ത്രണം ഏർപ്പെടുത്തി.

പാലക്കാട് അലനല്ലൂരിൽ കോഴിഫാമിൽ വെള്ളം കയറി 3000ത്തോളം കോഴികൾ ചത്തു. 

വെള്ളിയാർ കരകവിഞ്ഞതോടെയാണ് കർക്കിടാംകുന്നിലെ പാലക്കടവിലെ കോഴിഫാമിൽ വെള്ളം കയറിയത്.

എറണാകുളം ജില്ലയിൽ ഡിടിപിസിയുടെ കീഴിലുള്ള വിനോദസഞ്ചാര കേന്ദ്രങ്ങളിലേക്കുള്ള പ്രവേശനം നിരോധിച്ചു.

ജില്ലയിൽ ശക്തമായ മഴയുള്ള സാഹചര്യത്തിലാണ് മുന്നറിയിപ്പ്