ബൈക്കിൽ അജ്ഞാത വാഹനം ഇടിച്ച് യുവാവിന് ദാരുണാന്ത്യം; ഇടിച്ച വാഹനം നിർത്താതെ പോയി

വടക്കഞ്ചേരി (പാലക്കാട്) ∙ ദേശീയപാതയിൽ വടക്കഞ്ചേരി മേൽപാലത്തിൽ ബൈക്കിൽ അജ്ഞാത വാഹനം ഇടിച്ച്, ബൈക്ക് യാത്രക്കാരനായ യുവാവ് മരിച്ചു. ധോണി ഉമ്മിണി പഴമ്പുള്ളി വീട്ടിൽ ബി.അനിൽകുമാറാണ് (24) മരിച്ചത്. വെള്ളിയാഴ്ച പുലർച്ചെ 1:45 ന് അനിലിന്റെ ബൈക്ക് അതേ ദിശയിൽ സഞ്ചരിച്ച വാഹനവുമായി ഇടിക്കുകയായിരുന്നു. ഇടിച്ച വാഹനം നിർത്താതെ പോയി. 

തൃശൂരിൽ സുഹൃത്തിനെ കണ്ട് വീട്ടിലേക്ക് മടങ്ങുകയായിരുന്നു അനിൽകുമാർ. ഇടിയുടെ ശക്തിയിൽ അനിൽ റോഡിലേക്ക് തെറിച്ചു വീണു. പിന്നാലെ വന്ന യാത്രക്കാർ വിവരമറിയിച്ചതനുസരിച്ച് വടക്കഞ്ചേരി പൊലീസും ഹൈവേ പൊലീസും സ്ഥലത്തെത്തി ആശുപത്രിയിലെത്തിച്ചെങ്കിലും മരിച്ചു.

വടക്കഞ്ചേരി പൊലീസ് കേസെടുത്തു. ഇടിച്ച വാഹനം കണ്ടെത്താൻ പൊലീസ് സിസിടിവി ദൃശ്യങ്ങൾ പരിശോധിക്കുന്നുണ്ട്. മാതൃഭൂമി പാലക്കാട് യൂണിറ്റിലെ ജീവനക്കാരനാണ് അനിൽ. അച്ഛൻ: ബാലകൃഷ്ണൻ. അമ്മ: തങ്കമണി. സഹോദരൻ: അരുൺകുമാർ.