കുട്ടികള്‍ക്ക് വേണം പാന്‍ കാര്‍ഡ്, എങ്ങനെ എടുക്കും?
Mail This Article
കുട്ടികള്‍ക്ക് അവരുടെ സാമ്പത്തിക ഭാവി സുരക്ഷിതമാക്കാന്‍ സ്ഥിരം അക്കൗണ്ട് നമ്പര്‍ (പാന്‍) അത്യാവശ്യമാണ്. സാമ്പത്തികവും നിയമപരവുമായ വിവിധ ഇടപാടുകള്‍ക്കുള്ള തിരിച്ചറിയല്‍ രേഖയായി ഈ കാര്‍ഡ് ഉപയോഗിക്കാം. ആദായനികുതി നിയമത്തിലെ 160-ാം വകുപ്പ് പാന്‍ കാര്‍ഡ് യോഗ്യതയ്ക്ക് പ്രായപരിധിയൊന്നും വ്യക്തമാക്കിയിട്ടില്ല. അതിനാല്‍ കുട്ടികള്‍ക്ക് പാന്‍ കാര്‍ഡ് എടുക്കാവുന്നതാണ്.
എന്തിന് പാൻ?
പ്രത്യേക സാഹചര്യങ്ങളില്‍, പ്രാഥമികമായി സാമ്പത്തിക ഇടപാടുകളോ വരുമാന പ്രഖ്യാപനങ്ങളോ നടക്കുമ്പോള്‍ പ്രായപൂര്‍ത്തിയാകാത്തവര്‍ക്ക് പാന്‍ കാര്‍ഡ് അത്യാവശ്യമാണ്. അതായത്, ഷെയറുകളോ മ്യൂച്വല്‍ ഫണ്ടുകളോ പോലുള്ള നിക്ഷേപങ്ങളില്‍ കുട്ടിയെ നോമിനിയാക്കാന്‍ പദ്ധതിയുണ്ടെങ്കില്‍, മാതാപിതാക്കള്‍ അവരുടെ പ്രായപൂര്‍ത്തിയാകാത്ത കുട്ടിക്ക് ഒരു പാന്‍ കാര്‍ഡ് എടുക്കണം. അവരുടെ പേരില്‍ രക്ഷിതാക്കള്‍ നേരിട്ട് നിക്ഷേപിക്കുകയാണെങ്കില്‍, സാമ്പത്തിക നിയന്ത്രണങ്ങള്‍ പാലിക്കുന്നതിന് അവർക്ക് പാന്‍ കാര്‍ഡ് ആവശ്യമാണ്.
പ്രായപൂര്‍ത്തിയാകാത്തവരുടെ വരുമാനം സാധാരണയായി നികുതി ആവശ്യങ്ങള്‍ക്കായി മാതാപിതാക്കളുടെ വരുമാനവുമായി ബന്ധിപ്പിച്ചിരിക്കുന്നു. എന്നാലും ഇത്തരം വരുമാനം നികുതി വിധേയമാകും. മാത്രമല്ല പ്രായപൂര്‍ത്തിയാകാത്തയാള്‍ക്ക് അഭിനയം, സ്‌പോര്‍ട്‌സ്, എഴുത്ത് അല്ലെങ്കില്‍ സമാന പ്രവര്‍ത്തനങ്ങള്‍ വഴി വരുമാനം ലഭിക്കുന്നുണ്ടെങ്കില്‍ പാന്‍ കാര്‍ഡ് ആവശ്യമാണ്. സ്‌കോളര്‍ഷിപ്പ് പ്രോഗ്രാമുകളിലും സര്‍ക്കാര്‍ സ്‌കീമുകളിലും യോഗ്യത നേടുന്നതിന് പലപ്പോഴും പാന്‍ കാര്‍ഡ് ആവശ്യമാണ്.
എങ്ങനെ അപേക്ഷിക്കാം:
* NSDL PAN ആപ്ലിക്കേഷന്‍ വെബ്സൈറ്റ് ഗൂഗിളില്‍ തിരയുക, ആദ്യത്തെ ലിങ്ക് (ഔദ്യോഗിക NSDL പോര്‍ട്ടല്‍) ക്ലിക്ക് ചെയ്യുക.
∙'പുതിയ പാന്‍-ഇന്ത്യന്‍ പൗരന്‍ (ഫോം 49A)' തിരഞ്ഞെടുക്കുക.
∙ അതില്‍ 'വ്യക്തിഗത' ഓപ്ഷന്‍ തിരഞ്ഞെടുക്കുക.
∙ അപേക്ഷാ ഫോമില്‍ പ്രായപൂര്‍ത്തിയാകാത്തയാളുടെ മുഴുവന്‍ പേര്, ജനനത്തീയതി, മൊബൈല്‍ നമ്പര്‍, ഇമെയില്‍ ഐഡി എന്നിവ നല്‍കുക.
∙CAPTCHA കോഡ് നല്‍കി സബ്മിറ്റ് ചെയ്യുക
∙അപേക്ഷസമര്‍പ്പിച്ച ശേഷം, നിങ്ങള്‍ക്ക് ഒരു ടോക്കണ്‍ നമ്പര്‍ ലഭിക്കും.
∙അത് രേഖപ്പെടുത്തി 'പാന്‍ അപേക്ഷാ ഫോമിനൊപ്പം തുടരുക' എന്നതില്‍ ക്ലിക്ക് ചെയ്യുക.
∙ഡോക്യുമെന്റ് സമര്‍പ്പിക്കല്‍ മോഡ് തിരഞ്ഞെടുത്ത് ആധാര്‍ വിശദാംശങ്ങള്‍ ലിങ്ക് ചെയ്യുക.
∙ രക്ഷിതാക്കളുടെ വിവരങ്ങളും വരുമാന വിശദാംശങ്ങളും ചേര്‍ക്കുക, ആവശ്യമായ സഹായ രേഖകള്‍ അപ്ലോഡ് ചെയ്യുക.
∙ അപേക്ഷക്കായുള്ള ആവശ്യമായ ഫീസ് അടയ്ക്കുക.
∙പരിശോധയ്ക്ക്‌ന് ശേഷം, ഏകദേശം 15 ദിവസത്തിനുള്ളില്‍ പാന്‍ കാര്‍ഡ് പ്രോസസ്സ് ചെയ്യും.
∙പാന്‍ കാര്‍ഡ് തയ്യാറായാല്‍ ഓണ്‍ലൈനായി ഡൗണ്‍ലോഡ് ചെയ്യാം.
മാതാപിതാക്കളുടെ സമ്മതം
പ്രായപൂര്‍ത്തിയാകാത്തവര്‍ക്ക് സ്വതന്ത്രമായി അപേക്ഷിക്കാന്‍ കഴിയാത്തതിനാല്‍ അപേക്ഷയില്‍ മാതാപിതാക്കളുടെയോ രക്ഷിതാവിന്റെയോ സമ്മതം ഉണ്ടായിരിക്കണം.
