Live

മന്ത്രി നേരിട്ടെത്തി, ആറളത്തെ സമരം അവസാനിച്ചു; മൃതദേഹങ്ങൾ വീട്ടിലേക്കു കൊണ്ടുപോയി

കൊല്ലപ്പെട്ടവരുടെ ഓരോ ബന്ധുവിനു താൽക്കാലിക ആശ്രിത നിയമനം നൽകും, ആനമതിൽ നിർമാണം വേഗം പൂർത്തിയാക്കും എന്നും ഉറപ്പുനൽകിയതോടെയാണ് സമരം അവസാനിപ്പിച്ചത്.

ആറളം ഫാമിൽ കാട്ടാന ആക്രമണത്തിൽ കൊല്ലപ്പെട്ട ആദിവാസി ദമ്പതികളുടെ മൃതദേഹങ്ങളുമായി നാട്ടുകാർ നടത്തിയ പ്രതിഷേധം അവസാനിച്ചു. വനംമന്ത്രി എ.കെ.ശശീന്ദ്രൻ  മന്ത്രി എത്തിയതോടെയാണ്, 5 മണിക്കൂർ നീണ്ട സമരം അവസാനിച്ചത്.

മനുഷ്യ- വന്യജീവി സംഘർഷവുമായി ബന്ധപ്പെട്ടു സ്വീകരിക്കുന്ന നടപടികൾ വിലയിരുത്തുന്നതിന് മുഖ്യമന്ത്രി പിണറായി വിജയൻ ഉന്നതതല യോഗം വിളിച്ചു. 27ന് ഉച്ചയ്ക്കുശേഷം 3.30ന് സെക്രട്ടേറിയറ്റിലെ മുഖ്യമന്ത്രിയുടെ കോൺഫറൻസ് ഹാളിലാണു യോഗം. 

ആറളം പഞ്ചായത്തിൽ യുഡിഎഫും ബിജെപിയും പ്രഖ്യാപിച്ച ഹർത്താൽ പുരോഗമിക്കുകയാണ്.

സംഭവസ്ഥലത്തെത്തിയ സിപിഎം കണ്ണൂർ ജില്ലാ സെക്രട്ടറി എം.വി.ജയരാജൻ അടക്കമുള്ള നേതാക്കളെയും പ്രതിഷേധക്കാർ തടഞ്ഞു. ജനപ്രതിനിധികളും നേതാക്കളും ഇടപെട്ടിട്ടും നാട്ടുകാരെ ശാന്തരാക്കാനായില്ല.

വനം മന്ത്രി എ.കെ.ശശീന്ദ്രൻ ഇവിടെയെത്താതെ മൃതദേഹം വീട്ടിലേക്കു കൊണ്ടുപോകില്ലെന്നാണു പ്രതിഷേധക്കാർ പറയുന്നത്. 

ആറളം ഫാമിൽ കാട്ടാന ആക്രമണത്തിൽ കൊല്ലപ്പെട്ട ആദിവാസി ദമ്പതികളുടെ പോസ്റ്റ്‌മോർട്ടം പൂർത്തിയായി. ദമ്പതികളുടെ വീടിനു 100 മീറ്റർ അകലെ മൃതദേഹങ്ങളുമായെത്തിയ ആംബുലൻസ് നാട്ടുകാർ തടഞ്ഞിരിക്കുകയാണ്.

കുടുംബത്തിന് ആകെ 20 ലക്ഷം രൂപ നഷ്ടപരിഹാരം നൽകാനും ആദ്യഗഡുവായ 10 ലക്ഷം രൂപ ഇന്നുതന്നെ വിതരണം ചെയ്യാനും ജില്ലാ കലക്ടറുടെ അധ്യക്ഷതയിൽ ചേർന്ന അടിയന്തര ദുരന്തനിവാരണ സമിതി യോഗം തീരുമാനിച്ചു. ഒരാൾക്ക് 10 ലക്ഷം രൂപ വീതമാണ് വനംവകുപ്പിന്റെ നഷ്ടപരിഹാരം.

രോഷാകുലരായ നാട്ടുകാർ മൃതദേഹങ്ങൾ പോസ്റ്റ്മോർട്ടത്തിനു കൊണ്ടുപോകാൻ അനുവദിക്കാതെ തടഞ്ഞുവച്ചിരുന്നു. സ്ഥലത്തെത്തിയ സണ്ണി ജോസഫ് എംഎൽഎ ഉൾപ്പെടെ ഇടപെട്ടെങ്കിലും നാട്ടുകാർ ശാന്തരായില്ല. രാത്രി 11.30ന് ആണ് മൃതദേഹങ്ങൾ ആശുപത്രിയിലേക്കു മാറ്റാനായത്. 

ആറളം ഫാം പുനരധിവാസ മേഖലയിലെ 13–ാം ബ്ലോക്കിൽ കശുവണ്ടി ശേഖരിച്ചു മടങ്ങുകയായിരുന്ന ആദിവാസി ദമ്പതികളെയാണ് കാട്ടാന ചവിട്ടിക്കൊന്നത്. അമ്പലക്കണ്ടി പ്രദേശത്തെ പ്ലോട്ട് നമ്പർ 1542ൽ താമസിക്കുന്ന വെള്ളി (80), ഭാര്യ ലീല (75) എന്നിവരാണു കൊല്ലപ്പെട്ടത്. ഇരുവരും സംഭവസ്ഥലത്തുതന്നെ മരിച്ചു. മൃതദേഹങ്ങൾ ചവിട്ടിയരച്ച നിലയിലാണ്.