റോഡിന്റെ സംരക്ഷണ ഭിത്തി ഇടിഞ്ഞു

അതിരപ്പിള്ളി ∙ ആനമല പാതയിൽ ഇട്ട്യാനി ഭാഗത്ത് റോഡിന്റെ സംരക്ഷണ ഭിത്തി ഇടിഞ്ഞു. മഴവെള്ളം കുത്തിയൊലിച്ചു പോകുന്നതിനു എതിർവശത്താണ് കരിങ്കൽ ഭിത്തി ഇടിഞ്ഞു താഴ്ന്നത്. വന സംരക്ഷണ സമിതി ജീവനക്കാർ ഇടിഞ്ഞ ഭാഗത്ത് അപകട മുന്നറിയിപ്പ് സ്ഥാപിച്ചു.  മുളങ്കാലുകളിൽ ചാക്കുകൾ കെട്ടിമറച്ചാണ് സുരക്ഷാ സംവിധാനം ഒരുക്കിയത്. തുടർച്ചയായി വെള്ളം ഒഴുകുന്നതിനാൽ സമീപ പ്രദേശങ്ങളിലും സംരക്ഷണ ഭിത്തി തകരാൻ സാധ്യതയുണ്ടെന്നു നാട്ടുകാർ ചൂണ്ടിക്കാട്ടുന്നു. ഇടതടവില്ലാതെ ഭാരവാഹനങ്ങളും വിനോദ സഞ്ചാരികളും യാത്ര ചെയ്യുന്ന തിരക്കുള്ള റോഡാണിത്.