ഹൃദയം തൊടും മെലഡിയുമായി ‘ഉറ്റവർ’; ഏറ്റെടുത്ത് പ്രേക്ഷകർ

അനിൽ ദേവ് രചനയും സംവിധാനവും നിർവഹിക്കുന്ന ‘ഉറ്റവർ’ എന്ന ചിത്രത്തിലെ പുതിയ ഗാനം പുറത്ത്. ‘വിജനതയിൽ തളരരുതിനി നീ’ എന്നു തുടങ്ങുന്ന പാട്ടിന് ലോറൻസ് ഫർണാണ്ടസ് ആണ് വരികൾ കുറിച്ചത്. രാംഗോപാൽ ഹരികൃഷ്ണൻ ഈണം പകർന്ന ഗാനം ആതിര മുരളി ആലപിച്ചു. പാട്ട് ചുരുങ്ങിയ സമയത്തിനകം ശ്രദ്ധേയമായി. മികച്ച പ്രതികരണങ്ങളാണു ലഭിക്കുന്നത്. 

സിഇടി സിനിമാ പ്രൈവറ്റ് ലിമിറ്റഡിന്റെ ബാനറിൽ ഫിലിം ഫാന്റസി നിർമിക്കുന്ന ചിത്രമാണ് ‘ഉറ്റവർ’. വൈകാരിക മുഹൂർത്തങ്ങൾ കോർത്തിണക്കിയ ചിത്രത്തിന്റെ ട്രെയിലര്‍ ഏറെ ശ്രദ്ധിക്കപ്പെട്ടിരുന്നു. മൃദുൽ.എസ് ആണ് ഛായാഗ്രാഹകൻ. എഡിറ്റിങ്: ഫാസിൽ റസാഖ്. ചിത്രം റിലീസിനു തയ്യാറെടുക്കുകയാണ്.