Live

‘പരിസ്ഥിതി സ്നേഹികൾ കേസിന് പോയാണ് ഇങ്ങനെയായത്’: ശശീന്ദ്രനെ കൂക്കിവിളിച്ച് നാട്ടുകാർ, 48 മണിക്കൂർ കർഫ്യു

മാനന്തവാടി∙ പഞ്ചാരക്കൊല്ലിയിൽ കടുവ കൊലപ്പെടുത്തിയ രാധയുടെ വീട് സന്ദർശിക്കാൻ എത്തിയ മന്ത്രി എ.കെ.ശശീന്ദ്രനെ കൂക്കിവിളിച്ചു നാട്ടുകാർ. കനത്ത പ്രതിഷേധത്തിനിടെ വൻ പൊലീസ് സന്നാഹം ഏറെ പണിപ്പെട്ടാണു രാധയുടെ വീട്ടിലേക്കു മന്ത്രിയെ എത്തിച്ചത്. രാധയുടെ വീട് എത്തുന്നതിന് അൽപദൂരം മുൻപായി നാട്ടുകാർ റോഡിൽ ഇരുന്നു മന്ത്രിക്കെതിരെ പ്രതിേഷധം ആരംഭിച്ചിരുന്നു.

കടുവാഭീതി തുടരുന്നതിനാൽ മാനന്തവാടി നഗരസഭയിലെ ഡിവിഷൻ ഒന്ന് പഞ്ചാരക്കൊല്ലി, ഡിവിഷൻ രണ്ട് പിലാക്കാവ്, ഡിവിഷൻ 36 ചിറക്കര പ്രദേശങ്ങളിൽ 27ന് രാവിലെ ആറ് മുതൽ 48 മണിക്കൂർ കർഫ്യു പ്രഖ്യാപിച്ചു.  ഡിവിഷനുകളിലെ സ്കൂൾ, അങ്കണവാടി, മദ്രസ, ട്യൂഷൻ സെൻ്ററുകൾ തുറന്ന് പ്രവർത്തിക്കാൻ പാടില്ല.

കർഫ്യു പ്രഖ്യാപിച്ച ഡിവിഷനുകളിൽനിന്നു മറ്റ് വിദ്യാഭ്യാസ സ്ഥാപനങ്ങളിൽ പോയി പഠിക്കുന്ന വിദ്യാർഥികൾ 27, 28 തീയതികളിൽ സ്കൂളുകളിൽ ഹാജരാകേണ്ടതില്ല. പിഎസ്‌സി പരീക്ഷയ്ക്കും വിദ്യാഭ്യാസ സ്ഥാപനങ്ങൾ നടത്തുന്ന പരീക്ഷകൾക്കും അത്യാവശ്യമായി പോകേണ്ടവർ കൗൺസിലറുമായി ബന്ധപ്പെട്ട് ആവശ്യമായ ക്രമീകരണങ്ങൾ ചെയ്യണമെന്നും അധികൃതർ അറിയിച്ചു. 

രാധയെ കൊന്നതു വനത്തിലാണെന്നും സമരം രാഷ്ട്രീയ പ്രേരിതമാണെന്നും മന്ത്രി പറഞ്ഞതു തിരുത്തണമെന്നായിരുന്നു നാട്ടുകാരുടെ ആവശ്യം. മന്ത്രി എത്തുന്നത് കണക്കിലെടുത്ത് എസ്പി തപോഷ് ബസുമതാരിയുടെ നേതൃത്വത്തിൽ വൻ പൊലീസ് സന്നാഹം സ്ഥലത്തെത്തിയിരുന്നു. നൂറുകണക്കിനു പൊലീസുകാർ വീടിന് സമീപത്തു നിലയുറപ്പിച്ചു. 200 മീറ്ററോളം ദൂരം പ്രതിഷേധക്കാരെ പൊലീസ് തള്ളിമാറ്റിയാണു മന്ത്രിയെ രാധയുടെ വീട്ടിലേക്കു പ്രവേശിപ്പിച്ചത്. വാതിൽ അടച്ചിട്ടു മന്ത്രി കുടുംബവുമായി ചർച്ച നടത്തി.

രാധയുടെ മകനു വനംവകുപ്പിൽ താൽക്കാലിക ജോലി നൽകുന്നതിനുള്ള ഉത്തരവ് കൈമാറി. ഇതിനു ശേഷം മന്ത്രി എസ്റ്റേറ്റ് ഗെസ്റ്റ് ഹൗസിൽ എത്തി ജനപ്രതിനിധികളുമായും വനംവകുപ്പ് ഉദ്യോഗസ്ഥരുമായും ചർച്ച നടത്തി. സംസ്ഥാന സർക്കാർ ആദ്യമായാണു കടുവയെ വെടിവച്ചുകൊല്ലാൻ ഉത്തരവിടുന്നതെന്നു മന്ത്രി യോഗത്തിനു ശേഷം മാധ്യമപ്രവർത്തകരോടു പറഞ്ഞു. കടുവയെ വെടിവച്ചുകൊല്ലണമെന്നു മുഖ്യമന്ത്രിയും നിർദേശം നൽകിയിരുന്നു. അതിന്റെ അടിസ്ഥാനത്തിൽ നിയമവശങ്ങൾ പരിശോധിക്കുകയും വിദഗ്ധരുടെ അഭിപ്രായം തേടുകയും ചെയ്തശേഷമാണു വെടിവച്ചുകൊല്ലാൻ ഉത്തരവിട്ടത്.

പരിസ്ഥിതി സ്നേഹികൾ കേസിന് പോകാൻ സാധ്യതയുണ്ടെന്നും അഭിപ്രായം വന്നു. പരിസ്ഥിതി സ്നേഹികൾ കേസിന് പോയിപ്പോയാണ് ഈ അവസ്ഥയെത്തിയതെന്നും മന്ത്രി പറഞ്ഞു. വനത്തിനുള്ളിലാണു രാധ കൊല്ലപ്പെട്ടതെന്നു മാധ്യമപ്രവർത്തകരിൽനിന്ന് തനിക്കു തെറ്റായ വിവരം ലഭിച്ചതാണ്. കോൺഗ്രസ് നടത്തുന്നത് രാഷ്ട്രീയപ്രേരിത സമരമാണ് എന്നാണ് പറഞ്ഞതെന്നും മന്ത്രി പറഞ്ഞു. ഇതോടെ പ്രതിഷേധങ്ങൾ നേരിടാതെ മന്ത്രിക്കു തിരിച്ചുപോകാനായി.