വരുന്നു 28 വർഷത്തിനു ശേഷം ‘മിസ് വേൾഡ്’ ഇന്ത്യയിൽ: പ്രഖ്യാപിച്ച് 5 സുന്ദരികൾ; കാണാം ചിത്രങ്ങൾ

ആരായിരിക്കും ഇത്തവണത്തെ ലോക സുന്ദരി? അതിനുള്ള ഉത്തരം നൽകാനൊരുങ്ങുകയാണ് ഇന്ത്യ. ഫെബ്രുവരി 18 മുതൽ മാർച്ച് 9 വരെ നടക്കുന്ന മിസ് വേൾഡ് മത്സരത്തിന് ആതിഥേയത്വം വഹിക്കുന്നത് ഇന്ത്യയാണ്. 28 വർഷത്തിനു ശേഷമാണ് ലോക സുന്ദരിയെ തേടിയുള്ള മത്സരം ഇന്ത്യയിൽ നടക്കുന്നത്. ഡൽഹിയിലും മുംബൈയിലുമായാണ് മത്സരങ്ങൾ. പങ്കെടുക്കാനെത്തുന്നതാകട്ടെ നൂറ്റി ഇരുപതോളം രാജ്യങ്ങളിൽനിന്നുള്ള സുന്ദരിമാരും. സൗന്ദര്യ മത്സരത്തിന്റെ ഔദ്യോഗിക പ്രഖ്യാപനം നടന്നത് ഡൽഹിയിൽ. അതിനെത്തിയത് മുൻ ലോക സുന്ദരിമാരും. ഇന്ത്യയിൽനിന്നുള്ള മുൻ ലോക സുന്ദരി മാനുഷി ഛില്ലറും ഇപ്പോഴത്തെ ലോക സുന്ദരി പോളണ്ടിൽനിന്നുള്ള കരോളിന ബിലാവ്‌സ്കയും ഉൾപ്പെടെ അഞ്ചു പേരാണ് പ്രഖ്യാപനത്തിനെത്തിയത്. ഫെബ്രുവരി 20ന് ഇന്ത്യ ടൂറിസം വികസന കോർപറേഷന്റെ കൂടി പിന്തുണയോടെ ഡൽഹി ‘ഹോട്ടൽ ദ് അശോക’യിലായിരിക്കും മത്സരത്തിന്റെ ഉദ്ഘാടനം. മുംബൈയിലെ ജിയോ വേൾഡ് കൺവൻഷൻ സെന്ററിൽ മാർച്ച് ഒൻപതിനാണ് ഗ്രാൻഡ് ഫിനാലെ.