സംവിധായകന് 60 ലക്ഷത്തിന്റെ കാർ, സഹായികൾക്ക് ടിവിഎസ് അപ്പാച്ചെ; വിക്രം ആഘോഷമാക്കി കമൽ

വിക്രം നിറഞ്ഞ സദസ്സുകളിൽ പ്രദർശനം തുടരവെ ചിത്രത്തിന്റെ സംവിധായകനും സംവിധാന സഹായികൾക്കും സമ്മാനങ്ങൾ നൽകി കമൽഹാസൻ. സംവിധായകൻ ലോകേഷ് കനകരാജിന് ലക്സസ് ഇഎസ് 300 എച്ച് എന്ന ആഡംബര കാറും 13 സഹസംവിധായകർക്ക് അപ്പാച്ചെ 160 ആർടിആർ ബൈക്കുമാണ് കമൽ നൽകിയത്.

ലോകേഷിന് പുതിയ കാറിന്റെ താക്കോൽ കമൽ സമ്മാനിക്കുന്ന ചിത്രം സമൂഹമാധ്യമങ്ങളിൽ വൈറലാണ്. കൂടാതെ ‘നന്ദി ആണ്ടവനേ’ എന്ന ക്യാപ്ഷനോടെ കാറിന്റെ ചിത്രവും ലോകേഷ് സമൂഹമാധ്യമങ്ങളിൽ പോസ്റ്റ് ചെയ്തിട്ടുണ്ട്. ലെക്സസ് കാറുകളോടു ഭ്രമമുള്ള കമൽ ആദ്യമായാണ് അത്തരത്തിലൊന്ന് ഒരാൾക്ക് സമ്മാനമായി നൽകുന്നത്. ‘താനേ സേർന്ത കൂട്ടം’ എന്ന ചിത്രത്തിന്റെ വിജയം ആഘോഷിക്കുന്നതിന്റെ ഭാഗമായി നടൻ സൂര്യ സംവിധായകൻ വിഘ്നേഷ് ശിവന് ഇന്നോവയും തെലുങ്ക് നടൻ രവി തേജ സംവിധായകന് റേഞ്ച് റോവർ വേളാറും സമ്മാനിച്ചിട്ടുണ്ട്.

ജൂൺ 3 ന് റിലീസായ വിക്രത്തിന് വലിയ പ്രേക്ഷകസ്വീകാര്യതയാണ് ലഭിക്കുന്നത്. റിലീസ് ചെയ്ത് മൂന്നു ദിവസം കൊണ്ട് 100 കോടിയിലേറെ രൂപയാണ് ബോക്സ്ഓഫിസിൽ നിന്ന് ചിത്രം നേടിയത്. ‌മലയാളി താരങ്ങളായ ഫഹദ് ഫാസിൽ, നരേൻ, ചെമ്പൻ വിനോദ് ജോസ്, കാളിദാസ് ജയറാം ഉൾപ്പെടെയുള്ളവർ ചിത്രത്തിലുണ്ട്. കൈതി എന്ന തന്റെ ചിത്രത്തിന്റെ അടുത്ത ഭാഗമായിട്ടാണ് ലോകേഷ് വിക്രം ഒരുക്കിയിരിക്കുന്നത്. സൂപ്പർ താരം സൂര്യ അതിഥിവേഷത്തിൽ ചിത്രത്തിലെത്തുന്നുണ്ട്. അടുത്ത ഭാഗത്തിൽ തനിക്കൊപ്പം മുഴുനീള വില്ലൻ വേഷത്തിൽ സൂര്യ ഉണ്ടാകുമെന്ന് കമൽ ഹാസനും ഉറപ്പിച്ചു പറയുന്നുണ്ട്.

ലെക്സസ് ഇഎസ് 300 എച്ച്

ലെക്സസ് നിരയിലെ ഏറ്റവും മികച്ച കാറുകളിലൊന്നാണ് ഇഎസ്300എച്ച്. 2.5 ലീറ്റർ പെട്രോൾ എൻജിനും ഇലക്ട്രിക് മോട്ടറും ഉപയോഗിക്കുന്ന കാറിന് 160 കിലോവാട്ട് കരുത്തുണ്ട്. പരമാവധി 180 കിലോമീറ്റർ വേഗമുള്ള കാറിന് പൂജ്യത്തിൽനിന്ന് 100 കിലോമീറ്ററിലെത്താൻ 8.9 സെക്കൻഡ് മതി. എക്സ്‌ക്യൂസിറ്റ്, ലക്ഷ്വറി എന്നീ രണ്ടുമോഡലുകളുണ്ട് കാറിന്. എക്സ്‍ക്യുസിറ്റിന് 59.50 ലക്ഷം രൂപയും ലക്ഷ്വറിക്ക് 65.60 ലക്ഷം രൂപയുമാണ് എക്സ്ഷോറൂം വില.

English Summary: Kamal Haasan gifts a Lexus car to director Lokesh Kanagaraj post Vikram's success