മേഘങ്ങളുടെ ആലയം എന്ന അർത്ഥത്തിലാണ് ഈ സംസ്ഥാനത്തിന് മേഘാലയ എന്ന പേര് ലഭിച്ചത്. ശരിക്കുമൊരു മേഘഭവനം. നോക്കിനിൽക്കേ കറുത്ത മേഘങ്ങൾ ഉരുണ്ടു കൂടി ചിലപ്പോൾ കനപ്പെട്ടും, ചിലപ്പോൾ ചിണുങ്ങിയും നനയിച്ചു കളയും. ഇന്ത്യയിൽ ഏറ്റവും കൂടുതൽ മഴ ലഭിക്കുന്ന മൗസിന്റമും ചിറാപുഞ്ചിയുമെല്ലാം മേഘാലയത്തിലാണ്. കേരളത്തിലെ കാലാവസ്ഥയോടു സാമ്യമുള്ള ഇവിടെ കാർഷിക വിളകളും ഹരിതാഭയുള്ള പ്രകൃതിയുമാണ്. നിരവധി മലകളും കുന്നുകളും പുഴകളും തടാകങ്ങളുമെല്ലാം കൊണ്ട് പ്രകൃതി കനിഞ്ഞനുഗ്രഹിച്ചിടം.
